ସୁନ୍ଦରଗଡ଼, ୭/୨(ଏସଏସନିଉଜ) ରବିବାର ରାତିରେ ଲେଫ୍ରିପଡା ଥାନା ଅନ୍ତର୍ଗତ ସର୍ଗିପାଲି-ଏନଟିପିସି ରାସ୍ତା ବାଉଁଶପଡାଠାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ।ଏଥିରେ ୨ ଜଣ ମୃତ୍ୟୁବରଣ କରିଥିବାବେଳେ ୫ ଗୁରୁତର ଆହତ ହୋଇଛନ୍ତି । ଓଡି-୧୪ସି-୧୨୪୧ ମ୍ୟାଜିକ୍ ପିକ ଅପ୍ ଗାଡ଼ିରେ ନାକଡିହି ଗ୍ରାମର ବ୍ୟବସାୟୀ ମାନେ ଅଉଁଲାବାହାଲ ହାଟ ସାରି ରାତିରେ ଫେରୁଥିବାବେଳେ ଓଆର୍ ୧୬-ଡି-୫୩୭୯ନଂ ଖାଲି ଟ୍ରକ୍ ନଂ ସହିତ ମୁହାଁମୁହିଁ ଧକ୍କା ହେବା ଫଳରେ ଦୁର୍ଘଟଣା ଘଟିଥିଲା ।ଫଳରେ ଘଟଣାସ୍ଥଳରେ ସୁରେନ ମେହେର ଙ୍କ ମୃତ୍ୟୁ ହୋଇଥିଲା। ଗୁରୁତର ଆହତ ଥିବା ନନ୍ଦଲାଲ ମେହେର , ଆଶିଷ ମେହେର ,ସୁରେଶ ମେହେର, ଯୁଗଳ ମେହେର, ଅଯୋଧ୍ୟା ମେହେର ଓ ମୁକ୍ତେଶ୍ଵର ମେହେର ଙ୍କୁ ଚିକିତ୍ସା ପାଇଁ ସୁନ୍ଦରଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଥିଲା। ସେଠାରେ ନନ୍ଦଲାଲ ମେହେରଙ୍କ ଅବସ୍ଥା ସଙ୍କଟାପର୍ଣ ହେବାରୁ ବୁର୍ଲା ସ୍ଥାନାନ୍ତରିତ କରାଯାଇଥିଲା। କିନ୍ତୁ ସେଠାରେ ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି।ଏହାପରେ ଉତ୍ୟକ୍ତ ଗ୍ରାମବାସୀମାନେ ମୃତକଙ୍କ ପରିବାରକୁ କ୍ଷତିପୁରଣ ଓ ଆହତ ବ୍ୟକ୍ତିଙ୍କୁ ଚିକିତ୍ସା ସହାୟତା ଯୋଗାଇ ଦେବା ଦାବିରେ ରାସ୍ତା ଅବରୋଧ କରିଛନ୍ତି।