ହିନ୍ଦୋଳ,୨୩ା୭(ଏସଏସନିଉଜ)ବିଚ୍ ରାସ୍ତାରେ ସ୍ପଷ୍ଟ ଦିବାଲୋକରେ ହିନ୍ଦୋଳରେ ଜଣେ ଯୁବକଙ୍କୁ ଗୁଳି କରି ହତ୍ୟା କରାଯାଇଛି। ହତ୍ୟାକାଣ୍ଡ ପଛରେ ରାଜନୈତିକ ଶତ୍ରୁତା ଥିବା ସନ୍ଦେହ କରାଯାଉଛି। ମୃତ ଯୁବକ ବାଲିମି ଥାନା ମାହାଲୁଣ୍ଡା ଗ୍ରାମର ତ୍ରିନାଥ ସାହୁଙ୍କ ପୁଅ ସୁବାସ ସାହୁ (୨୪) ବୋଲି ଜଣାପଡ଼ିଛି। ପୁଲିସ ଜଣେ ଅଭିଯୁକ୍ତକୁ କାବୁ କରିଥିବାବେଳେ ଅନ୍ୟ ଜଣେ ଫେରାର ହୋଇ ଯାଇଛି। ସୁବାସ କୌଣସି କାମରେ ହିନ୍ଦୋଳ ଆସି ଘରକୁ ଫେରୁଥିବାବେଳେ ନୂଆବଗ ଶନି ମନ୍ଦିର ନିକଟରେ ଦୁଇଜଣ ଯୁବକ ତାଙ୍କୁ ପଛପଟୁ ଗୁଳିମାଡ଼ କରିଥିଲେ। ସୁବାସଙ୍କ ବାମ ପାର୍ଶ୍ବ ଛାତିରେ ୨ରାଉଣ୍ଡ ଗୁଳି ବାଜିଥିଲା। ଘଟଣାସ୍ଥଳରେ ହିଁ ସେ ଟଳି ପଡ଼ିଥିଲେ। ଗୁଳି ଫୁଟାଇ ଅଭିଯୁକ୍ତମାନେ ପଳାଉଥିବାାବେଳେ ସ୍ଥାନୀୟ ଲୋକେ ସେମାନଙ୍କୁ ଗୋଡ଼ାଇଥିଲେ। ଅଭିଯୁକ୍ତମାନେ ଜଙ୍ଗଲ ଭିତରେ ପଶି ଯାଇଥିଲେ। ପରେ ପୁଲିସ ଓ ସ୍ଥାନୀୟ ଲୋକଙ୍କ ଉଦ୍ୟମରେ ସେମାନଙ୍କ ମଧ୍ୟରୁ ଜଣଙ୍କୁ କାବୁ କରାଯାଇଥିଲା।