ବାରଙ୍ଗ,୧୨/୯ (ଏସଏସନିଉଜ)ବାରଙ୍ଗ ରାଜ ରାସ୍ତାରେ ସିରିଜ୍ ଦୁର୍ଘଟଣାରେ ଦୁଇଟି କାର କ୍ଷତିଗ୍ରସ୍ତ ହେଉଥିବା ବେଳେ ଏକ ଅଜଣା ଟ୍ରକ ଘଟଣାସ୍ଥଳରୁ ଫେରାର ହୋଇଯାଇଛି। ଫଳରେ ଦୁଇ କାର ଚଳକଙ୍କ ପକ୍ଷରୁ ବାରଙ୍ଗ ଥାନାରେ ଅଭିଯୋଗ ହୋଇଥିବା ବେଳେ ଜଣେ ଦୁଇ ଜଣ ମହିଳା ଆହତ ହୋଇଛନ୍ତି। ପୋଲିସ ସେମାନଙ୍କୁ ଚିକିତ୍ସା ପାଇଁ ଡାକ୍ତରଖାନା ପଠାଇଛି। ସୂଚନା ମୁତାବକ ଗୁରୁବାର ମଧ୍ୟାହ୍ନ ସମୟରେ ଓଡ଼ି୦୨ଏଏଲ୫୧୬୨ ମାରୁତି କାରଟି ଯାତ୍ରୀଙ୍କୁ ନେଇ ଭୁବନେଶ୍ବର ପଟୁ କଟକ ଅଭିମୁଖେ ଯାଉଥିଲା। ଏହି ସମୟରେ ବାରଙ୍ଗ ଫୁଲପୋଖୋରୀ ଗ୍ରାମ ନିକଟ ମୁଖ୍ୟ ରାସ୍ତା ଉପରେ ଥିବା ହମ୍ପସ ପୂର୍ବରୁ ରାସ୍ତାରେ ଯାଉଥିବା ଏକ ଅଜଣା ଟ୍ରକଟି ହଠାତ୍ ଗାଡ଼ିର ବ୍ରେକ ମାରିଥିଲା। ଫଳରେ ମାରୁତି କାର ଚାଳକ ଜଣକ ଟ୍ରକର ପଛ ପାର୍ଶ୍ଵରେ ଯାଇ ଧକ୍କା ହୋଇଥିଲେ। ଏହା ପଛକୁ ଓଡ଼ି୦୫ଏଏଚ୮୪୮୪ ହ୍ୟୁଣ୍ଡାଇ କାରଟି ଭାରସାମ୍ୟ ହରାଇ ସାମ୍ନାରେ ଥିବା ମାରୁତି କାରକୁ ଧକ୍କା ଦେଇଥିଲା। ଦୁର୍ଘଟଣା ପରେ ଟ୍ରକ ଚାଲାଣ ଗାଡ଼ି ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏଥିରେ ମାରୁତି କାରର ସମ୍ମୁଖ ଭାଗ ଏବଂ ପଛ ଭାଗ ସମ୍ପୂର୍ଣ୍ଣ ଭାଙ୍ଗିରୁଜି ଯାଇଛି। ସେହିପରି ହ୍ୟୁଣ୍ଡାଇ କାରଟିର ସମ୍ମୁଖ ଭାଗ ମଧ୍ୟ କ୍ଷତିଗ୍ରସ୍ତ ହୋଇଥିଲା। ଏହି ଘଟଣାରେ ମାରୁତି କାରରେ ଥିବା ଯାତ୍ରୀଙ୍କ ମଧ୍ୟରୁ ଦୁଇଜଣ ମହିଳା ସାମାନ୍ୟ ଆହତ ହୋଇଥିଲେ। ଉକ୍ତ ଘଟଣାରେ ଉଭୟ ପକ୍ଷରୁ ଥାନାରେ ଅଭିଯୋଗ ହୋଇଥିବା ବେଳେ ପୋଲିସ ଗାଡି ଦୁଇଟିକୁ ଜବତ କରି ତଦନ୍ତ ଚଳାଇଛି।