ଗାଜିଆବାଦ ୩/୧(ସତ୍ୟାସନ୍ଧାନ) ଶବଦାହ କରିବାକୁ ଆସିଥିଲେ। ଶବ ହୋଇ ଫେରିଲେ। ଶ୍ମଶାନରେ ଶେଷକୃତ୍ୟ ପରେ ଶୋକ ପାଳିବାକୁ ଶ୍ମଶାନଘାଟ ନିକଟ ଗ୍ୟାଲେରି ପାଖରେ ଏକାଠି ହୋଇଥିବା ଲୋକଙ୍କ ଉପରେ ଛାତ ଭୁଶୁଡ଼ି ପଡ଼ିବାରୁ ୧୫ ଜଣଙ୍କ ମୃତ୍ୟୁ ଘଟିଲା। ଉତ୍ତର ପ୍ରଦେଶର ଗାଜିଆବାଦରେ ରବିବାର ଏପରି ଏକ ଦୁର୍ଭାଗ୍ୟପୂର୍ଣ୍ଣ ଘଟଣା ରାଜ୍ୟରେ ଆଲୋଡ଼ନ ସୃଷ୍ଟି କରିଛି।ଏହି ଦୁର୍ଘଟଣାରେ ୨୦ରୁ ଅଧିକ ଲୋକ ଆହତ ହୋଇଛନ୍ତି। ପ୍ରଶାସନ ପକ୍ଷରୁ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ଆହତମାନଙ୍କୁ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି ଆଶଙ୍କା କରାଯାଉଛି।ସୂଚନା ଅନୁସାରେ, ମୁରାଦନଗର ଡିଫେନ୍ସ କଲୋନୀ ନିବାସୀ ଫଳ ବିକ୍ରେତା ଜୟରାମ(୬୫)ଙ୍କ ଶେଷକୃତ୍ୟରେ ଯୋଗଦେବା ଲାଗି ୪୦ରୁ ଅଧିକ ଲୋକ ଶ୍ମଶାନଘାଟକୁ ଯାଇଥିଲେ। ଶେଷକୃତ୍ୟ ସମ୍ପନ୍ନ ହେବା ପରେ ଲୋକମାନେ ଗେଟ୍ ନିକଟ ଗ୍ୟାଲେରି ପାଖରେ ଶୋକ ପାଳନ ପାଇଁ ଏକାଠି ହୋଇଥିଲେ। ଏହି ସମୟରେ ବର୍ଷା ଯୋଗୁ ଗ୍ୟାଲେରି ଛାତ ହଠାତ୍ ଭୁଶୁଡ଼ି ପଡ଼ିଥିଲା। ଛାତ ତଳେ ୪୦ରୁ ଅଧିକ ଲୋକ ଚାପି ହୋଇଯାଇଥିଲେ।ସ୍ଥାନୀୟ ଲୋକେ ତୁରନ୍ତ ପହଞ୍ଚି ସେମାନଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ। ଖବର ପାଇ ପୁଲିସ ଓ ପ୍ରଶାସନିକ ଅଧିକାରୀ ଘଟଣାସ୍ଥଳରେ ପହଞ୍ଚି ଆମ୍ବୁଲାନ୍ସ ଜରିଆରେ ଆହତମାନଙ୍କୁ ହସ୍ପିଟାଲ ନେଇଛନ୍ତି। ଏମଏମଜି ହସ୍ପିଟାଲରେ ୧୫ଟି ମୃତଦେହ ପହଞ୍ଚିଛି।ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଘଟଣା ସମ୍ପର୍କରେ ଅବଗତ ହେବା ପରେ ଜିଲାପାଳ ଏବଂ ଏସପିଙ୍କୁ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟକୁ ତ୍ବରିତ କରିବା ସହିତ ଘଟଣାର ଅନୁଧ୍ୟାନ କରିବାକୁ ନିର୍ଦେଶ ଦେଇଛନ୍ତି। ମୁଖ୍ୟମନ୍ତ୍ରୀ କହିଛନ୍ତି, ଘଟଣାରେ ପ୍ରଭାବିତ ବ୍ୟକ୍ତିମାନଙ୍କୁ ଯଥାସମ୍ଭବ ସହାୟତା ଯୋଗାଇ ଦିଆଯିବ। ଆହତମାନଙ୍କୁ ସମସ୍ତ ଚିକିତ୍ସା ସୁବିଧା ପ୍ରଦାନ କରାଯିବ
- Advertisement -
